Во периодот од 28 јуни до 4 јули 2024 година, во рамки на акциското истражување „Од различност до праведност – еднакви во правото на здрава одржлива животна средина за сите“, реализиравме осум регионални тркалезни маси низ сите осум плански региони во Република Северна Македонија. Овие активности беа од суштинско значење за мапирање на локалните потреби и предизвици во врска со заштитата на животната средина и отпорноста на климатските промени.

Што се случи?

Тркалезните маси беа организирани во: Скопје, Тетово, Валандово, Крива Паланка, Неготино, Охрид, Битола и Берово. Во процесот учествуваа претставници од локалната самоуправа, младински совети, социјални совети, јавни центри за социјална работа, даватели на социјални услуги, граѓански здруженија и младински организации.

Нашата главна цел беше да отвориме простор за конструктивна дискусија и заедничко размислување за локалните еколошки проблеми, со акцент на улогата на младите како лидери во процесите за заштита на животната средина.

Клучни елементи од активностите:

• Разновидно учество: Секоја тркалезна маса вклучи меѓу 12 и 16 учесници, кои споделија свои гледишта, искуства и предлози поврзани со локалните еколошки предизвици и можни решенија.

• Структурирани и инклузивни дискусии: Форматот на дискусиите беше внимателно осмислен за да овозможи активна и еднаква вклученост на сите учесници. Секој глас беше слушнат и земен предвид во изработката на препораките.

• Регионални извештаи: По завршувањето на секоја тркалезна маса, беа подготвени извештаи со идентификувани наоди, предлози и заклучоци специфични за секој регион.

  

  

Резултати и идни насоки:

Собраните наоди од тркалезните маси ќе бидат вградени во сеопфатен национален извештај. Овој документ ќе претставува основа за понатамошна меѓусекторска и партнерска соработка на локално и национално ниво. Извештајот ќе биде клучен водич во креирањето на стратегии за заштита на животната средина и адаптација кон климатските промени.

Благодарност

Искажуваме искрена благодарност до сите учесници и засегнати страни кои придонесоа за успехот на овие средби. Нивната посветеност и ентузијазам се нашата инспирација во градењето на поздрава, поодржлива и поинклузивна животна средина.

Проектот „ЗЗЗ - Заеднички за Зелено Застапување за Заштита на Животната Средина“ е поддржан од Владата на Швајцарија преку програмата Civica Mobilitas. Проектот се реализира во партнерство помеѓу: Center for Youth Activism KRIK / КРИК, Центар за социјални иницијативи „Надеж“ и Здружението на социјални работници на Македонија – ЗСРМ.

Целта на проектот е воведување на еколошката перспектива во социјалната и младинската работа, како суштински елемент за заштита на животната средина и создавање инклузивно и демократско општество за сите.