Прв ден – вовед и основни концепти

Обуката започна со воведна сесија и креативна интерактивна вежба за запознавање („Прва асоцијација“), која постави отворена и колаборативна атмосфера. Учесниците потоа дискутираа за правните прашања поврзани со животната средина и учествуваа во симулацијата „Бродолом“, преку која ги разгледуваа етичките дилеми, одговорноста и правдата во контекст на социјалната и еколошката заштита. Попладнето беше фокусирано на зелената социјална работа и врската меѓу социјалната заштита и заштитата на животната средина, разгледувајќи добри практики и предизвици.

Втор ден – од анализа до стратегија

Вториот ден започна со практичната алатка „Дрво на проблемот“, при што учесниците идентификуваа еколошки и социјални предизвици во своите заедници. Следеше поставување цели за застапување и мапирање засегнати страни – клучни чекори за дефинирање успешна иницијатива. Во попладневниот дел се разработуваа стратегии и комуникациски планови за зелено застапување, а групите работеа на конкретни идеи за локални проекти, вградувајќи мерки за обезбедување ресурси и одржливост.

Трет ден – имплементација, следење и одржливост

Последниот ден беше посветен на практичните аспекти на имплементацијата: следење, евалуација и долгорочна одржливост на иницијативите. Учесниците ги финализираа своите акциски планови, разработувајќи индикатори за успех и механизми за обезбедување континуирана поддршка. Посебно внимание беше посветено на вклучувањето на младите преку активизам, волонтерство и практиканство, како движечка сила за одржлива промена.

Резултати и следни чекори

Обуката заврши со групна евалуација и договор за натамошна соработка. Учесниците изразија висок степен на мотивација да ги применат стекнатите знаења во развивање и спроведување на зелени иницијативи во своите заедници. Обуката дополнително ја прошири мрежата на професионалци и активисти посветени на заштитата на животната средина и унапредувањето на социјалната правда.