Прв ден – поставување основи

Обуката започна со воведна сесија и запознавање преку креативна активност. Следуваа тематски сесии посветени на значењето на заштитата на животната средина, правните аспекти поврзани со екологијата и основните поими од областа на социјалната заштита. Првиот ден беше насочен кон градење заедничка основа и разбирање на врските помеѓу екологијата и социјалниот развој.

Втор ден – поврзување на социјалната правда и екологијата

Преку тематски работилници и симулациски вежби, учесниците дискутираа за улогата на социјалната и младинската работа во справувањето со еколошките предизвици. Особено внимание беше посветено на концептот на социјална правда, како и на алатките за анализа на проблеми и потреби во заедницата, со цел подготвување за застапување базирано на докази.

Трет ден – планирање конкретни иницијативи

Фокусот на последниот ден беше на процесот на застапување: од дефинирање цели и мапирање засегнати страни, до развој на стратегии и комуникациски планови. Учесниците изработија нацрт-планови за локални зелени иницијативи, со акцент на мерливост, обезбедување ресурси и одржливост.

Обуката заврши со групна евалуација и договор за натамошна соработка во рамки на проектот, чија главна цел е да го внесе концептот на „зелена перспектива“ како составен дел од професионалната социјална и младинска работа – со цел унапредување на заштитата на животната средина и градење инклузивни општества.

Проектот “ЗЗЗ – Заеднички за Зелено Застапување за Заштита на Животната Средина” е поддржан од Владата на Швајцарија преку програмата Civica Mobilitas, во партнерство со Центар за младински активизам КРИК, Центар за социјални иницијативи „Надеж“ и Здружението на социјални работници на Македонија – ЗСРМ.