Иницијативата беше спроведена од Софија Мицкоска и Димитар Гогу, со поддршка од менторката Мила Карадафова Ангеловска. Во активностите учествуваа ученици, наставници и волонтери од ЕКЕ Битола, кои заеднички придонесоа за почиста и поуредена околина во училиштето и неговата околина.
Што се реализираше?
Активноста започна со кратка едукативна презентација за значењето на заштитата на животната средина и важноста од одржување на чиста околина. Учениците разговараа за негативните последици од фрлањето отпад, но и за одговорноста што ја имаат поединците, институциите, општините и надлежните служби во одржувањето на животната средина.
Посебен акцент беше ставен на улогата на младите како активни и одговорни членови на заедницата.
По едукативниот дел следуваше практична акција за чистење. Учениците добија демонстрација за безбедно користење на механички фаќалки за отпад, по што им беа поделени фаќалки и вреќи за отпад. Тие беа поделени во мали групи од два до три учесници и започнаа со чистење на дворот и околината на училиштето.
За само 20 минути беа собрани 25 вреќи отпад од по 30 литри, со што значително се подобри чистотата и изгледот на просторот. Учениците покажаа голем интерес и ентузијазам, а механичките фаќалки дополнително ја зголемија нивната мотивација за учество.
По завршувањето на акцијата, на учесниците им беше обезбедено освежување, а механичките фаќалки беа оставени во училиштето со цел учениците и наставниците да продолжат со вакви активности и во иднина.
Резултати и влијание
Преку иницијативата:
- 33 учесници беа директно вклучени (25 ученици на возраст од 11 до 14 години, 4 наставници и 4 волонтери од ЕКЕ Битола);
- беше исчистен дворот и околината на училиштето, при што беа собрани 25 вреќи отпад;
- кај учениците се зголеми свеста за важноста на заштитата на животната средина;
- младите добија практично искуство за активно учество во подобрување на локалната заедница;
- беше идентификуван и пријавен конкретен еколошки проблем преку платформата zzz.org.mk, преку што учениците се запознаа со механизмите за граѓанско учество и пријавување на проблеми од јавен интерес.
Предизвици и научени лекции
Во текот на реализацијата имаше мали логистички промени поврзани со локацијата и возраста на учениците, но тие беа успешно надминати.
Активноста покажа дека децата се особено мотивирани кога имаат можност директно да се вклучат во практични активности и кога им се обезбедуваат соодветни алатки. Исто така, се потврди дека ваквите акции имаат најголем ефект кога се прилагодени на интересите и реалните услови на учесниците.
Оваа иницијатива уште еднаш покажува дека кога младите добиваат простор, поддршка и знаење, тие можат да станат вистински двигатели на позитивни промени во својата заедница. 🌱
Активноста е дел од проектот „ЗЗЗ – Заеднички за зелено застапување за заштита на животната средина“, финансиран од Embassy of Switzerland in North Macedonia преку програмата Civica Mobilitas, а реализиран од Центар за младински активизам КРИК, Center for Social Initiatives Nadez и Здружение на социјални работници на Македонија – ЗСРМ.
#CivicaMobilitas #CHinMK