Токму ова прашање е во сржта на иницијативата „Зелено општество – Примена на мерката општокорисна работа за деца преку меѓуинституционална соработка“, која има за цел да пилотира нов пристап во примената на мерката општокорисна работа за деца, поврзувајќи ја со принципите на зелената социјална работа.

Иницијативата се реализира во општините Неготино, Демир Капија, Росоман и Кавадарци каде преку партнерство меѓу локалните самоуправи, центрите за социјална работа, јавните комунални претпријатија, училиштата и другите релевантни институции ќе се воспостави модел за практична примена на мерката.

Иако општокорисната работа е законски предвидена како воспитна мерка, таа сè уште ретко се применува во пракса. Оваа иницијатива предлага нов пристап – мерката да се пилотира како форма на зелена социјална работа, каде активностите не само што ќе придонесуваат за развојот и ресоцијализацијата на детето, туку ќе создаваат и конкретни придобивки за животната средина и локалната заедница.

Наместо општокорисната работа да се сведува на исполнување на законска обврска, иницијативата ја препознава како можност младите да се вклучат во активности како што се уредување и одржување на зелени површини, пошумување, разубавување на јавни простори, еколошки акции и други активности кои истовремено развиваат чувство на одговорност, солидарност и грижа за природата.

На овој начин, зелената социјална работа добива практична димензија – ги поврзува социјалната инклузија, воспитувањето и ресоцијализацијата на децата со заштитата на животната средина. Наместо да се гледа само низ призмата на интервенцијата, социјалната работа станува двигател на локални зелени промени и активен чинител во градењето одржливи заедници.

🤝 Преку ова пилотирање ќе се тестира модел на меѓуинституционална соработка кој, доколку се покаже успешен, може да стане пример и за други општини во државата. Целта е да се покаже дека општокорисната работа може да биде многу повеќе од законска мерка – таа може да биде иновативна практика на зелена социјална работа, која истовремено придонесува за благосостојбата на децата, заедницата и животната средина.

📖 Повеќе за почетокот на иницијативата: https://www.facebook.com/share/p/1M3qtuhATK/

🌍 Иницијативата е дел од проектот „ЗЗЗ – Заеднички за зелено застапување за заштита на животната средина“, поддржан од Владата на Швајцарија преку Civica Mobilitas, во партнерство со ЦМА КРИК, Центарот за социјални иницијативи „Надеж“ и Здружението на социјални работници на Македонија.

💚 Кога социјалната работа создава зелени промени, придобивките ги чувствуваат и луѓето и природата.