Активностите се одржаа во Младинскиот центар „Мулти Култи“ и обединија 34 ученици на возраст од 11 до 18 години од основни и средни училишта.

Она што ја направи оваа иницијатива особено значајна е активната улога на средношколците, кои настапија како млади лидери и го водеа процесот на групна работа, поттикнувајќи дискусија, критичко размислување и соработка.

🌍 Прва работилница: Локални еколошки проблеми и carbon footprint

Првата едукативна работилница беше посветена на препознавање на локалните еколошки предизвици и разбирање на поимот carbon footprint (јаглероден отпечаток).

Преку интерактивна работа во мали групи, учесниците дискутираа за:

- влијанието на секојдневните навики врз животната средина,

- одговорното управување со отпад,

- можностите за намалување на личниот јаглероден отпечаток.

Посебен фокус беше ставен на рециклирањето на пластични шишиња и улогата на вендинг машините на Пакомак во намалување на отпадот. Учесниците се запознаа со видовите пластика што можат да се рециклираат и разговараа за важноста од правилно селектирање и одложување на отпадот.

Работилницата заврши со активноста „Мрежа на живот“, преку која на практичен начин се прикажа поврзаноста на сите чинители во екосистемот и како загадувањето на еден сегмент може да има последици врз целата природна рамнотежа.

👕 Втора работилница: Текстилен отпад и одржливи избори

Втората работилница беше насочена кон текстилниот отпад – тема која сè повеќе добива на значење во современото општество.

Преку реални сценарија од секојдневието (стари патики, купување нова облека), младите работеа во групи и предлагаа еколошки решенија, како повторна употреба, донирање или рециклирање.

Интерактивната активност „се согласувам/не се согласувам“ отвори простор за критичка дебата за навиките што влијаат врз природата, додека преку активноста „carbon sandwich“ учесниците практично го измерија јаглеродниот отпечаток на еден производ. Работилницата заврши со заедничка дискусија за конкретни чекори што можат да ги преземат младите за намалување на текстилниот отпад.

🎯 Што постигнавме?

Иницијативата резултираше со:

- Зајакнати капацитети на 4 млади лидери за спроведување зелени и едукативни активности.

- Зголемена еколошка свест кај најмалку 34 млади за рециклирање, селектирање и одржливо управување со пластичен и текстилен отпад.

- Идентификувани локални еколошки проблеми и предложени практични решенија од страна на самите учесници.

💡 Научени лекции

Процесот покажа дека младите веќе поседуваат солидно предзнаење за еколошки теми и имаат способност критички да ги согледаат проблемите во својата заедница. Сепак, потребни се повеќе простори за охрабрување, практични активности и можности каде тие ќе можат активно да иницираат и реализираат решенија.

„Green Rangers“ не беше само серија работилници – туку чекор кон создавање генерација млади луѓе кои размислуваат одговорно, делуваат локално и придонесуваат кон позелена иднина за Куманово. 🌿


Активноста е дел од проектот „ЗЗЗ – Заеднички за зелено застапување за заштита на животната средина“, финансиран од Embassy of Switzerland in North Macedonia преку програмата Civica Mobilitas, а реализиран од Центар за младински активизам КРИК, Center for Social Initiatives “Nadez” и Здружение на социјални работници на Македонија – ЗСРМ.