Në kuadër të projektit “ZZZ – Së Bashku për Avokim të Gjelbër”, gjatë periudhës mars – maj 2026, u realizuan pesë punëtori me temën “Eko-Terapia përmes Kompostimit”, ku morën pjesë 28 të rinj nga Institucioni Edukativo-Korrektues në Tetovë.

Qëllimi i iniciativës ishte të nxisë përgjegjësinë, bashkëpunimin, aftësitë praktike dhe vetëdijen ekologjike tek të rinjtë. Përmes aktiviteteve edukative dhe praktike, pjesëmarrësit fituan njohuri mbi menaxhimin e duhur të mbetjeve organike, kujdesin ndaj mjedisit dhe ndërtimin e shprehive pozitive dhe të qëndrueshme.

Gjatë punëtorive, pjesëmarrësit u përfshinë në:

Aktivitete edukative dhe praktike për kompostimin dhe rritjen e vetëdijes ekologjike;

Zhvillimin e ideve dhe krijimin e logos dhe identitetit të produktit të kompostit;

Përgatitjen e ambalazhit për produktin përmes aktiviteteve të qepjes;

Krijimin dhe dekorimin kreativ të vazove prej peletash;

Mbjelljen e luleve dhe bimëve aromatike për përdorim të mëtejshëm në vazot e punuara.

Përveç aspektit edukativ dhe praktik, aktivitetet u shoqëruan me mbështetje të vazhdueshme psikosociale. Përmes ushtrimeve për njohjen dhe rregullimin e emocioneve, si dhe vizualizimeve të udhëhequra duke shfrytëzuar përfitimet e natyrës, pjesëmarrësit patën mundësinë të forcojnë mirëqenien e tyre emocionale.

Të gjitha aktivitetet u zhvilluan në natyrë, e cila u dëshmua si një hapësirë e sigurt dhe mbështetëse për mësim dhe zhvillim personal. Mjedisi natyror kontribuoi në krijimin e qetësisë, zvogëlimin e stresit dhe pasigurisë, si dhe në nxitjen e kreativitetit dhe shprehjes personale.

Për pjesëmarrësit, këto punëtori përfaqësonin shumë më tepër sesa aktivitete të zakonshme. Ato krijuan një hapësirë ku të rinjtë mund të ndjenin përkatësi, pranim, mbështetje dhe zhvillim personal.

Iniciativa u realizua në bashkëpunim me Shoqatën për Qëndrueshmëri Kreative “Kombo” nga Shkupi, mbështetja dhe ekspertiza e së cilës kontribuuan në realizimin e suksesshëm të aktiviteteve.

Shprehim mirënjohjen tonë të sinqertë ndaj Institucionit Edukativo-Korrektues në Tetovë për besimin dhe mbështetjen e vazhdueshme, si dhe një falënderim të veçantë për Natasha Ristovskën, udhëheqëse e sektorit të risocializimit, për përkushtimin e saj në realizimin e kësaj iniciative me ndikim pozitiv tek të rinjtë.

Aktiviteti është pjesë e projektit “ZZZ – Së bashku për avokim të gjelbër për mbrojtjen e mjedisit jetësor”, i financuar nga Embassy of Switzerland in North Macedonia përmes programit Civica Mobilitas, dhe i realizuar nga Center for Youth Activism KRIK, Center for Social Initiatives “Nadez” dhe Association of Social Workers of Macedonia – ZSRM.