Si duket kur të rinjtë bëhen nxitës të ndryshimeve në komunitetin e tyre? Përgjigjen e dha iniciativa “Oborr shkollor i pastër dhe i gjelbër – për një komunitet të shëndetshëm dhe gjithëpërfshirës”, e cila, përmes parimeve të **punës sociale të gjelbër, bashkoi nxënësit, shkollën dhe komunitetin lokal në një aksion të përbashkët për një mjedis jetësor më të shëndetshëm dhe më të qëndrueshëm.

Iniciativa u realizua në SHMK “Shaip Jusuf” në Komunën e Shuto Orizarit, ku rreth 30 nxënës u përfshinë aktivisht në pastrimin dhe rregullimin e oborrit të shkollës, si dhe në mbjelljen e 16 fidanëve të rinj.

Megjithatë, qëllimi i iniciativës ishte shumë më tepër sesa zbukurimi i hapësirës – ajo synonte të tregonte se kujdesi për mjedisin fillon me pjesëmarrjen personale, përgjegjësinë e përbashkët dhe ndjenjën e përkatësisë ndaj komunitetit.

Në frymën e punës sociale të gjelbër, aktiviteti lidhi përgjegjësinë mjedisore, përfshirjen sociale dhe pjesëmarrjen e të rinjve. Nxënësit nuk ishin vetëm pjesëmarrës në një aksion ekologjik, por aktorë aktivë të cilët, përmes punës praktike, zhvilluan ndërgjegjësimin mjedisor, bashkëpunimin në ekip, solidaritetin dhe përgjegjësinë ndaj hapësirës publike.

🌱 Puna sociale e gjelbër nënkupton se ndryshimet në mjedis janë njëkohësisht edhe ndryshime te njerëzit dhe komunitetet e tyre. Pikërisht për këtë arsye, kjo iniciativë e shndërroi oborrin e shkollës në një hapësirë për të mësuar, për t’u lidhur dhe për të vepruar së bashku, duke i inkurajuar të rinjtë të jenë bartës të ndryshimeve pozitive dhe shembull i sjelljes së qëndrueshme.

🤝 Iniciativa të tilla tregojnë se përmes aksioneve të vogla, por konkrete lokale, mund të krijojmë një ndjenjë më të madhe komuniteti, të forcojmë kujdesin për mjedisin dhe të ndërtojmë gjenerata që do ta shohin qëndrueshmërinë si një vlerë të përbashkët, dhe jo si një detyrim individual.

🌍 Kjo iniciativë është pjesë e projektit “ZZZ – Së bashku për avokim të gjelbër për mbrojtjen e mjedisit”, i mbështetur nga Qeveria e Zvicrës përmes Civica Mobilitas, në partneritet me QMA KRIK, Qendrën për Iniciativa Sociale “Nadezh” dhe Shoqatën e Punonjësve Socialë të Maqedonisë.